Presidenti amerikan Donald Trump ka njoftuar se CNN, MS NOW dhe Politico nuk do të lejohen më në Shtëpinë e Bardhë.
Trumpi e bëri të ditur vendimin përmes një postimi në Truth Social.
Ai i akuzoi tri mediat se publikojnë dhe raportojnë atë që ai i cilësoi si “fiksione dhe gënjeshtra” për administratën e tij.
Megjithatë, presidenti amerikan nuk përmendi raste konkrete që, sipas tij, e kanë çuar në këtë vendim.
Më vonë, Trumpi e përshkroi masën si një “ndalim shumë të thjeshtë”. Ai nuk dha detaje se si do të zbatohet ajo.
Pavarësisht njoftimit, gazetarët e CNN dhe Politico vazhduan të qëndrojnë në ambientet e Shtëpisë së Bardhë.
CNN e kundërshtoi vendimin, duke e cilësuar si sulm ndaj lirisë së shtypit. Rrjeti tha se do ta mbështesë ekipin e tij në Shtëpinë e Bardhë.
Edhe Politico tha se do të vazhdojë të raportojë për administratën Trump dhe do t’i mbrojë të drejtat e gazetarëve të garantuara me Amendamentin e Parë.
MS NOW, që më herët njihej si MSNBC, nuk komentoi menjëherë.
Reagim pati edhe nga Shoqata e Korrespondentëve të Shtëpisë së Bardhë.
Presidentja e saj, Jacqui Heinrich, tha se organizata qëndron në mbrojtje të gazetarëve që, sipas saj, po veçohen për punën e tyre.
Ajo theksoi se çështja prek edhe të drejtën e publikut amerikan për të marrë informacion të plotë dhe të pavarur për punën dhe vendimet e presidentit.
Sinjali – aty ku e vërteta flet para lajmit!
