Tragjedia që tronditi zonën e Plakës në Athinë ka lënë pas dhimbje të madhe te familjarët dhe miqtë e katër viktimave.
Nikoleta Gjioni, mike e afërt e familjeve, ka rrëfyer për mediat greke detaje rreth viktimave, duke përshkruar jetën, planet dhe momentet e fundit para tragjedisë.
Mes viktimave ishin Florinda Hoxha dhe bashkëshorti i saj, Ian Alexander Kirkpatrick, si dhe çifti Florin Hoxha e Erisa Çani.
Gjioni e përshkroi Florindën si një grua të jashtëzakonshme dhe një avokate shumë të zonja, duke thënë se ajo ishte “plot jetë” dhe se sapo ishte martuar me Ianin.
“Ishte një njeri i mrekullueshëm. Një avokate e shkëlqyer, plot jetë. Ende nuk mund ta besoj se kjo ka ndodhur”, tha ajo.
Detaje veçanërisht prekëse lidhen me çiftin tjetër, Florin Hoxha dhe Erisa Çani. Sipas mikes së familjes, ata ishin sapomartuar dhe kishin udhëtuar drejt Greqisë për muajin e mjaltit.
Çifti po priste fëmijën e parë dhe, sipas Gjionit, ishin jashtëzakonisht të lumtur për ardhjen në jetë të vajzës së tyre.
“Florini dhe Erisa ishin shumë të emocionuar, sepse prisnin fëmijën e tyre të parë. Ishin jashtëzakonisht të lumtur që do të bëheshin prindër”, rrëfeu ajo.
“Erisa ishte shtatzënë me vajzën e tyre”, shtoi Gjioni.
Ajo tregoi edhe ankthin që kishte përjetuar pas tragjedisë, duke thënë se kishte qëndruar zgjuar gjatë gjithë natës dhe kishte telefonuar vazhdimisht në numrat e viktimave, me shpresën se ekipet e shpëtimit mund t’i dëgjonin telefonat.
“Qëndrova zgjuar gjithë natën duke telefonuar në numrat e tyre, me shpresën se shpëtimtarët do t’i dëgjonin telefonat dhe do të arrinin t’i gjenin”, tha ajo.
Gjioni i përshkroi të katër viktimat si njerëz të mirë, të zgjuar dhe gjithmonë të gatshëm për t’i ndihmuar të tjerët.
Ajo tregoi gjithashtu se familjet kishin planifikuar të takoheshin më 17 tetor për të festuar Halloween-in, një plan që tashmë është kthyer në një kujtim të dhimbshëm.
Gjioni ka publikuar edhe fotografi të Erisës dhe Florinit, duke ndarë me publikun disa momente nga jeta e çiftit që humbi tragjikisht jetën.
Sinjali – aty ku e vërteta flet para lajmit!
