Një mosmarrëveshje për largimin e një veture përfundoi me të shtëna me armë zjarri në rrugën “Mbreti Pirro” në Pejë.
Siç mëson televizioni, 46-vjeçari Suad Kelmendi, së bashku me vëllain e tij, i kërkuan 29-vjeçit Butrint Krasniqi, ta largonte automjetin, raporton Klan Kosova.
Pasi ai nuk e bëri këtë, të dy e sulmuan fizikisht.
E pas përleshjes, ky i fundit shkoi në shtëpi, mori armën dhe u rikthye në vendngjarje, ku gjuajti nëntë herë në drejtim të Kelmendit, duke e plagosur me pesë plumba.
Menjëherë në vendin e ngjarjes dolën njësitet policore, prokuroria e emergjenca.
I dyshuari nuk u arrestua menjëherë. Por, pas disa orësh, atë e dorëzoi në polici babai i tij, ndërsa më pas u kryen bastisje edhe në shtëpinë e të njëjtit.
Viktima mori trajtimin e nevojshëm mjekësor në spitalin e qytetit, pastaj u dërgua në QKUK.
Ndërkaq, i dyshuari është ndaluar për 48 orë, kurse prokurori i rastit është duke përgatitur kërkesën për caktimin e paraburgimit.
