Protesta të reja për krizën e strehimit janë paralajmëruar të shtunën në Madrid dhe qytete të tjera të Spanjës, një ditë pasi parlamenti rrëzoi dy masa të qeverisë që synonin forcimin e mbrojtjes së qiramarrësve.
Masat ishin prezantuar pas protestave të zhvilluara në të gjithë vendin, të nxitura edhe nga rasti i 87-vjeçares Maricarmen Abascal, e cila u dëbua nga apartamenti në Madrid ku kishte jetuar për rreth shtatë dekada.
Sindikata e Qiramarrësve, që po koordinon protestat, ka bërë thirrje për demonstrata në më shumë se 50 qytete.
Në Madrid, aktivistët kanë ngritur kampe prej rreth një jave në Puerta del Sol, një nga sheshet kryesore të kryeqytetit. Protestuesit pritet të nisen nga disa pika të qytetit rreth mesditës, para se të mblidhen në Plaza de Cibeles.
Sipas AFP-së, paketa e masave e rrëzuar nga parlamenti përfshinte rinovimin automatik të kontratave të qirasë pas skadimit të tyre, si dhe masa që synonin kufizimin e dëbimeve të qiramarrësve në situata të cenueshme.
Strehimi prej vitesh është një nga shqetësimet kryesore në Spanjë. Kërkesa për banesa vazhdon të jetë më e lartë se oferta, ndërsa çmimet e shtëpive dhe qiratë janë rritur ndjeshëm.
Problemi i kostove të banimit është shfaqur edhe në vende të tjera të Bashkimit Evropian, ku rritja e çmimeve të banesave dhe qirave ka shtuar presionin mbi familjet.
Sinjali – aty ku e vërteta flet para lajmit!
