Të paktën 11 persona janë vrarë nga sulmet izraelite në jug të Libanit, në një prej ditëve më vdekjeprurëse që nga njoftimi i marrëveshjes së qershorit, e cila synonte uljen e armiqësive mes palëve.
Kryeministri i Libanit, Nawaf Salam, ka bërë të ditur se shtatë persona u vranë në një sulm ndaj një shtëpie në periferi të Ansarit, në rajonin e Nabatiehut.
Sipas medias shtetërore libaneze, mes viktimave janë edhe tre fëmijë dhe dy gra.
Më vonë gjatë së shtunës, një valë tjetër sulmesh goditi qytetin Deir al-Zahrani, ku katër persona të tjerë humbën jetën dhe pesë u plagosën, sipas Ministrisë së Shëndetësisë së Libanit.
Ushtria izraelite ka deklaruar se kishte goditur “infrastrukturën terroriste të Hezbollahut”, duke thënë se sulmet erdhën si përgjigje ndaj një veprimi të mëparshëm kundër ushtarëve izraelitë.
Sulmi në Ansar raportohet se ndodhi rreth orës 04:30 në një zonë ku jetonin familje të zhvendosura. Pamjet e publikuara në rrjetet sociale treguan re të mëdha tymi mbi zonë, ndërsa dëgjoheshin sirenat.
Kryeministri Salam i dënoi ashpër sulmet, duke theksuar se shtatë personat e vrarë në Ansar ishin civilë.
“Izraeli duhet ta ndalë këtë përshkallëzim”, deklaroi ai, duke shtuar se siguria e qytetarëve libanezë dhe e drejta e tyre për të jetuar në tokën e tyre nuk mund të jenë objekt negociatash.
Forcat Mbrojtëse të Izraelit thanë se incidenti që parapriu sulmin ndaj Ansarit kishte ndodhur në kreshtën Ali al-Taher, një pikë strategjike që mbikëqyr një pjesë të madhe të Libanit juglindor.
Agjencia Kombëtare e Lajmeve e Libanit raportoi gjithashtu për disa sulme në zonën përreth kësaj kreshte.
Pranë kufirit, raportohet se disa shtëpi janë shkatërruar në Bint Jbeil, ndërsa forcat izraelite dyshohet se kanë hapur zjarr të rëndë drejt zonave të banuara.
Tensionet në Liban janë përshkallëzuar ndjeshëm që nga përfshirja e Hezbollahut në konfliktin mes Izraelit, SHBA-së dhe Iranit, ndërsa sulmet dhe kundërsulmet kanë vazhduar përgjatë muajve të fundit.
Sinjali – aty ku e vërteta flet para lajmit!
