Hapja e shumëpritur e Urës Ndërkombëtare Gordie Howe, që lidh Shtetet e Bashkuara të Amerikës me Kanadanë, është shtyrë sërish, sipas njoftimit të autoriteteve kanadeze përgjegjëse për projektin.
Ceremonia e hapjes së urës, e cila ishte planifikuar të mbahej nesër, është shtyrë për një datë të pacaktuar, ndërsa të dy palët po punojnë për zgjidhjen e disa çështjeve të mbetura.
Zyrtarë të Autoritetit të Urës Windsor-Detroit (WDBA) konfirmuan se Kanadaja dhe SHBA kanë rënë dakord për shtyrjen, me qëllim sigurimin e kushteve të nevojshme për përfundimin e procesit.
Sipas tyre, ura pritet të jetë një lidhje e rëndësishme ekonomike dhe infrastrukturore mes dy vendeve, duke lehtësuar ndjeshëm qarkullimin e mallrave dhe njerëzve në kufirin më të ngarkuar ndërkombëtar në Amerikën e Veriut.
Ndërtimi i projektit ka nisur në vitin 2018 dhe është konsideruar si një nga investimet më të mëdha infrastrukturore mes SHBA-së dhe Kanadasë në dekadat e fundit.
Autoritetet nuk kanë dhënë detaje për arsyet e vonesës, por kanë theksuar se po punohet intensivisht për caktimin e një date të re për hapjen zyrtare të urës.
Sinjali – aty ku e vërteta flet para lajmit!
