Një 21-vjeçar është arrestuar nga Policia e Shkodrës pasi gjatë kontrollit në banesën e tij janë zbuluar disa armë zjarri dhe municion.
Operacioni policor i koduar “Kalibri” çoi në ndalimin e të riut me inicialet R.M., në fshatin Trush, pas informacioneve të siguruara nga strukturat hetimore.
Gjatë kontrolleve në banesë, policia gjeti dhe sekuestroi katër armë zjarri, përfshirë një automatik, një pushkë dhe dy armë gjahu, si dhe një sasi të konsiderueshme municioni.
Materialet e sekuestruara janë dërguar për ekspertizë në Institutin e Policisë Shkencore, ku do të kryhen verifikime për të përcaktuar nëse armët mund të jenë përdorur në ndonjë ngjarje kriminale.
Rasti i është referuar Prokurorisë pranë Gjykatës së Shkallës së Parë të Juridiksionit të Përgjithshëm në Shkodër, e cila ka nisur hetimet për zbardhjen e plotë të rrethanave dhe origjinës së armëve.
Sinjali – aty ku e vërteta flet para lajmit!
