Policia gjermane ka arrestuar të martën një person të dyshuar për lidhje me një seri sulmesh ndaj sistemeve të shpërndarjes së energjisë elektrike në Gjermani, raste që nxitën një operacion të gjerë kërkimi për disa ditë.
Një 48-vjeçar është arrestuar pranë një termocentrali në Weisweiler, në landin perëndimor të Nordrhein-Westfalenit.
Policia e Këlnit ka bërë të ditur se i dyshuari, emri dhe shtetësia e të cilit nuk janë publikuar për shkak të rregullave gjermane për mbrojtjen e privatësisë, kishte në posedim lëndë shpërthyese. Mediat lokale e kanë identifikuar gjerësisht atë si Daniel V.
Sipas policisë, ai nuk ka bërë rezistencë gjatë arrestimit.
Sulmet e para të dyshuara për sabotim ndodhën në fillim të javës së kaluar në një nënstacion pranë termocentralit me qymyr në Jänschwalde, në verilindje të Gjermanisë. Disa orë më vonë, një qark i shkurtër nxori jashtë funksionit linjat e energjisë në një nënstacion elektrik në Bergheim, pranë Këlnit.
Pas këtyre incidenteve, zyrtarët e lartë të sigurisë në të dy landet ngritën alarmin, duke deklaruar se nuk mund të përjashtohej mundësia që sulmet të ishin kryer nga fuqi të huaja.
Incidentet ndodhën në një kohë kur Gjermania ndodhej në gatishmëri të lartë, pasi qeveria kishte akuzuar Rusinë për një përpjekje sulmi në aeroportin Leipzig/Halle më 4 gusht, përmes një droni të ngarkuar me eksplozivë.
Megjithatë, ministri i Brendshëm gjerman, Alexander Dobrindt, deklaroi të premten se autoritetet besonin se aktet ishin kryer nga një aktivist i vetëm dhe se rasti lidhej me ekstremizmin klimatik.
Përveç rasteve të para pranë Jänschwalde dhe Bergheimit, 48-vjeçari dyshohet se ka tentuar në disa lokacione në Nordrhein-Westfalen, si dhe në landet lindore të Brandenburgut dhe Saksonisë, të përdorte raketa të prodhuara vetë për të hedhur një tel të hollë mbi linjat e tensionit të lartë, me qëllim shkaktimin e një qarku të shkurtër.
Policia ka bërë të ditur se të martën oficerët ndodheshin në Weisweiler për të siguruar prova dhe për të kontrolluar nëse në zonën përreth ishin vendosur pajisje të tjera shpërthyese që ende nuk ishin zbuluar.
Sinjali – aty ku e vërteta flet para lajmit!
