Drejtues të disa prej kompanive më të fuqishme të Inteligjencës Artificiale po bëjnë thirrje për ngadalësimin e zhvillimit të modeleve më të avancuara, mes shqetësimeve se teknologjia po përparon më shpejt sesa aftësia për ta kuptuar dhe kontrolluar atë.
Drejtori ekzekutiv i Anthropic, Dario Amodei, ka kërkuar që kompanitë të ulin ritmin e rritjes së aftësive të modeleve të AI-së, duke argumentuar se vetëm investimet në siguri nuk janë më të mjaftueshme.
Thirrja e tij është mbështetur edhe nga drejtues të kompanive rivale. Elon Musk, drejtues i xAI, tha se “Dario ka të drejtë”, ndërsa edhe shefi i OpenAI, Sam Altman, është shprehur në favor të kontrollimit të ritmit të zhvillimit të modeleve më të fuqishme.
Amodei kërkon më shumë akses për ekspertët e pavarur të sigurisë, standarde të përbashkëta për industrinë dhe ndërhyrje të qeverive. Sipas tij, një ritëm më i ngadaltë do t’u jepte studiuesve dhe autoriteteve kohë për të ndërtuar mekanizma më të fortë sigurie, shkruan Euronews.
Shqetësimet janë shtuar pas rasteve ku modele të avancuara të AI-së kanë kryer veprime kibernetike pa dijeninë e kompanive që i zhvillojnë. Një tjetër shqetësim është aftësia e AI-së për të ndihmuar në krijimin e gjeneratave të ardhshme të vetë teknologjisë, duke përshpejtuar edhe më tej zhvillimin.
Debati ka mbërritur edhe në Kongresin amerikan, ku disa ligjvënës kërkojnë rregulla dhe masa të detyrueshme sigurie. Ndërkohë, presidenti Donald Trump ka thënë se shqetësimi i tij kryesor është që SHBA-ja të mos humbasë garën teknologjike me Kinën.
Thirrjet për ngadalësim shënojnë një zhvillim të pazakontë në industrinë e AI-së, pasi kompani rivale po kërkojnë më shumë kohë dhe mekanizma kontrolli përpara se teknologjia të bëhet edhe më e fuqishme.
Sinjali – aty ku e vërteta flet para lajmit!
