Inspektori i Përgjithshëm i Departamentit amerikan të Mbrojtjes ka thënë se lufta me Iranin ka shkaktuar “mungesa” të municioneve dhe një ngushticë në furnizimin e tyre, duke kundërshtuar deklaratat e përsëritura të presidentit Donald Trump se SHBA-ja nuk po përballet me mungesa.
Trump ka pretenduar se rezervat amerikane të municioneve janë “praktikisht të pakufizuara” dhe se raportimet e kundërta janë “lajme të rreme”.
Megjithatë, raporti i këtij institucioni të pavarur mbikëqyrës tregon se SHBA-ja ka shpenzuar më shumë se 22 miliardë dollarë për municione nga shkurti deri në qershor, gjë që ka çuar në “mungesa strategjike të rezervave”, raporton BBC – transmeton Sinjali.
Raporti i ri ofron një pasqyrë të rrallë dhe të pavarur mbi rezervat amerikane të armëve, të dhëna që zakonisht mbahen të klasifikuara.
Vlerësimet e mëparshme kanë paraqitur një situatë shqetësuese lidhur me mungesat e armëve amerikane.
Gjatë luftës, forcat amerikane kanë përdorur sasi të mëdha të sistemeve me rreze të gjatë për goditje tokësore, si dhe sistemeve të mbrojtjes ajrore dhe raketore të përdorura për të interceptuar sulmet iraniane.
Një vlerësim i publikuar në fund të korrikut nga Qendra për Studime Strategjike dhe Ndërkombëtare (CSIS) konstatoi se rezervat e disa sistemeve interceptuese, përfshirë raketat Patriot dhe Terminal High Altitude Area Defense (THAAD), ishin reduktuar ndjeshëm, në disa raste me më shumë se gjysmën.
Raporti i inspektorit të përgjithshëm nuk bëri të ditur saktësisht se sa armë kanë mbetur në rezervat amerikane.
Megjithatë, ai konfirmoi mungesat në inventar dhe evidentoi “ngushtica në bazën industriale” për rimbushjen e rezervave të municioneve.
Në raport thuhet gjithashtu se Departamenti i Mbrojtjes po punon për të “thjeshtuar proceset e prokurimit dhe afatet e prodhimit”, me qëllim adresimin e mungesave dhe “reagimin e shpejtë ndaj një situate të jashtëzakonshme”.
Trump dhe zyrtarë të tjerë të administratës së tij kanë mohuar raportimet për mungesa, duke i cilësuar ato si të rreme dhe madje “tradhti”.
Në një postim në X më 4 gusht, për shembull, Sekretari i Mbrojtjes, Pete Hegseth, i përshkroi raportimet mediatike për mungesat si “jo të vërteta”.
Sinjali – aty ku e vërteta flet para lajmit!
