Qeveria e Kosovës ka mbajtur sot mbledhjen e radhës, ku ka miratuar një varg vendimesh.
Ndër vendimet kryesore është Projektligji për ndryshimin dhe plotësimin e Ligjit për Ndarjet Buxhetore për vitin 2026.
Përmes tij parashihen 102 milionë euro shtesë. Mjetet synojnë mbulimin e detyrimeve ligjore dhe nevojave prioritare të buxhetit.
Qeveria ka miratuar edhe disa projektligje për marrëveshje financiare me Bashkimin Evropian.
Bëhet fjalë për programet IPA 2021, IPA 2022 dhe Programin Shumëvjeçar IPA 2026-2027.
Në mbledhje është miratuar edhe Projektligji për ndryshimin dhe plotësimin e Ligjit për Parandalimin e Pastrimit të Parave dhe Luftimin e Financimit të Terrorizmit.
Po ashtu, është miratuar Projektligji për Menaxhimin e Resurseve Ujore.
Në fushën e zhvillimit ekonomik, Qeveria ka miratuar Planin e Veprimit 2026-2028 të Strategjisë për Zhvillim Industrial dhe Mbështetje të Biznesit 2030.
Është miratuar edhe udhëzimi për procedurën e themelimit të parqeve industriale dhe teknologjike.
Në mbledhje janë marrë edhe disa vendime për shpronësime.
Ato lidhen me projekte infrastrukturore në Ferizaj, Prishtinë, Podujevë, Prizren, Han të Elezit, Gjakovë, Lipjan dhe komuna të tjera.
Mes tyre është edhe zgjerimi i rrugës nacionale Prishtinë–Podujevë dhe segmenti Banullë–Bresalc i autostradës Prishtinë–Gjilan–Dheu i Bardhë.
Qeveria ka ndarë gjithashtu 200 mijë euro për ndërtimin e urës në rrugën “Agron Mehmeti” në Shtrubullovë të Drenasit.
Për projekte në Podujevë dhe Shtime janë rialokuar mbi 1.08 milionë euro.
Në fushën e shëndetësisë, është miratuar nisma për negocimin e një marrëveshjeje kredie me Bankën Evropiane të Investimeve.
Marrëveshja lidhet me pajisje mjekësore dhe përmirësimin e infrastrukturës shëndetësore.
Po ashtu, Qeveria ka kërkuar autorizim për nënshkrimin e marrëveshjes së kredisë me Bankën Zhvillimore të Këshillit të Evropës për përmirësimin e kujdesit shëndetësor sekondar dhe terciar.
Në mbledhje janë emëruar edhe komisionet e pranimit për disa pozita të larta drejtuese.
Bëhet fjalë për pozitat në Akademinë e Kosovës për Siguri Publike, Agjencinë për Regjistrim Civil dhe Agjencinë e Menaxhimit Emergjent.
Qeveria ka ndarë edhe 350 mijë euro për promovimin ndërkombëtar të filmave kosovarë “Dua” dhe “Shame and Money”, në kuadër të rrugëtimit të tyre drejt Oscar Academy Awards.
Ndër vendimet e tjera është edhe miratimi i Statutit të Korporatës së Ruajtjes së Energjisë, ndërmarrje publike në pronësi të Republikës së Kosovës.
Gjithashtu, është miratuar rregullorja për fushat e përgjegjësisë administrative të ministrive dhe rregullorja për riintegrimin e personave të riatdhesuar.
Qeveria ka miratuar edhe vendimin për themelimin e grupeve tematike për rishikimin e Strategjisë Kombëtare për Zhvillim 2030.
Në mbledhjen e sotme janë marrë edhe vendime të tjera lidhur me buxhetin, infrastrukturën, shpronësimet, energjinë dhe projektet komunale.
Sinjali – aty ku e vërteta flet para lajmit!
