Presidenti rus, Vladimir Putin, ka urdhëruar forcat ruse që t’i ndërpresin për tri ditë sulmet ndaj Kievit, ka bërë të ditur zëdhënësi i Kremlinit, Dmitry Peskov.
Urdhri hyn në fuqi në mesnatën e 6 shtatorit dhe do të zgjasë deri më 9 shtator. Vendimi është lidhur me vizitën e të dërguarve amerikanë, Steve Witkoff dhe Jared Kushner, të cilët po zhvillojnë takime në Moskë dhe pritet të udhëtojnë edhe në Kiev për bisedime rreth përfundimit të luftës.
Megjithatë, ndalimi i shpallur nga Kremlini vlen vetëm për kryeqytetin ukrainas dhe nuk përfshin rajonin e Kievit apo qytetet e tjera të Ukrainës.
Kreu i Qendrës ukrainase për Luftimin e Dezinformimit, Andrii Kovalenko, e kritikoi vendimin, duke thënë se ai nuk mund të konsiderohet armëpushim i mirëfilltë.
“Putini po urdhëron ndalimin treditor të sulmeve ndaj Kievit dhe civilëve, por jo ndaj rajonit të Kievit apo rajoneve dhe qyteteve të tjera të Ukrainës”, deklaroi Kovalenko.
Sipas tij, kufizimi i urdhrit vetëm në Kiev tregon se Rusia nuk është e gatshme t’i japë fund luftës.
Njoftimi erdhi para vizitës së përfaqësuesve amerikanë në Ukrainë dhe Rusi, ndërsa sulmet në pjesë të tjera të territorit ukrainas kanë vazhduar.
Sinjali – aty ku e vërteta flet para lajmit!
