Presidenti iranian Masoud Pezeshkian ka mbrojtur memorandumin e mirëkuptimit të arritur mes Iranit dhe Shteteve të Bashkuara, duke e cilësuar atë si rrugën më të mirë për ta nxjerrë vendin nga situata që ai e përshkroi si “as luftë, as paqe”.
Në një fjalim të publikuar të dielën nga agjencia shtetërore iraniane IRNA, Pezeshkian tha se anëtarët e Këshillit të Lartë të Sigurisë Kombëtare e konsiderojnë memorandumin marrëveshjen më të mirë të mundshme në rrethanat aktuale.
“Shikoni dispozitat e memorandumit, nuk do të gjeni asnjë pikë të vetme në të cilën ne jemi tërhequr apo jemi dorëzuar”, deklaroi ai.
Memorandumi, i nënshkruar në qershor edhe nga presidenti amerikan Donald Trump, parashihte një afat prej 60 ditësh për arritjen e një marrëveshjeje lidhur me konfliktin dhe programin bërthamor iranian.
Megjithatë, afati ka përfunduar pa ndonjë marrëveshje përfundimtare, ndërsa dallimet mes Uashingtonit dhe Teheranit mbeten të mëdha, veçanërisht rreth çështjes së Ngushticës së Hormuzit.
Pezeshkian theksoi se Irani nuk synon të tërhiqet përballë kundërshtarëve, por pranoi se pasiguria aktuale po dëmton ekonominë dhe mundësinë për të tërhequr investime.
“Kapitali dhe paratë janë gjërat më të ndjeshme jo njerëzore që ekzistojnë. Ne duhet ta largojmë këtë rrezik nga vendi”, tha ai.
Ekonomia iraniane vazhdon të përballet me presion të madh nga sanksionet dhe kufizimet në eksportin e naftës, ndërsa Teherani kërkon një rrugëdalje nga ngërçi politik dhe ekonomik me Uashingtonin.
Sinjali – aty ku e vërteta flet para lajmit!
