Dy persona, të moshës 25 dhe 26 vjeç, kanë humbur jetën mëngjesin e së enjtes në një aksident të rëndë me motoçikletë në Oberengstringen, në kantonin e Cyrihut.
Sipas autoriteteve zvicerane, aksidenti ndodhi pak para orës 06:00, pasi një patrullë policore vuri re motoçikletën duke lëvizur me shpejtësi dhe duke kryer parakalime të rrezikshme në autostradë.
Drejtuesi i mjetit raportohet se nuk mbante helmetë dhe nuk iu bind urdhrit të Policisë për t’u ndalur, duke vazhduar lëvizjen në drejtim të Cyrihut.
Gjatë hyrjes në zonën e pushimit në Oberengstringen, motoçikleta dyshohet se goditi një pengesë anësore, ndërsa drejtuesi humbi kontrollin. Mjeti u përplas fillimisht me një rimorkio kamioni të parkuar dhe më pas përfundoi nën një kamion tjetër.
Si pasojë e lëndimeve të rënda, të dy personat vdiqën në vendin e ngjarjes.
Autoritetet kanë bërë të ditur se viktimat ishin shtetas algjerianë, ndërsa motoçikleta ishte raportuar e vjedhur gjatë natës në kantonin e Zugut.
Rrethanat e plota të aksidentit po hetohen nga Policia Kantonale e Cyrihut në bashkëpunim me Prokurorinë.
Sinjali – aty ku e vërteta flet para lajmit!
