Një stuhi e fuqishme ka goditur verilindjen e Shteteve të Bashkuara, duke shkaktuar përmbytje bregdetare, ndërprerje të energjisë elektrike, probleme në komunikacion dhe anulime të shumta të fluturimeve e ngjarjeve publike.
Dhjetëra milionë njerëz në rajon janë përfshirë nga moti i keq, ndërsa Shërbimi Kombëtar i Motit në SHBA ka paralajmëruar për përmbytje të rrezikshme bregdetare, erëra të forta dhe reshje të dendura shiu në zona që përfshijnë New York City dhe Boston.
Gjendje e jashtëzakonshme është shpallur në Nju Jork dhe Nju Xhersi, ku disa komunitete bregdetare janë përballur me përmbytje. Reshje të dendura dhe erëra të fuqishme janë raportuar nga Virxhinia deri në Maine, njofton BBC.
Në Brooklyn, një person humbi jetën pasi u godit nga një pemë e rrëzuar gjatë stuhisë.
Ndërkohë, më shumë se 100 mijë familje kanë mbetur pa energji elektrike, kryesisht në verilindje të vendit.
Stuhia ka shkaktuar gjithashtu kaos në transportin ajror. Më shumë se 2,400 fluturime janë vonuar, ndërsa rreth 1,200 të tjera janë anuluar. Autoritetet u kanë bërë thirrje udhëtarëve që të kontrollojnë statusin e fluturimeve me kompanitë ajrore.
Situata është rënduar edhe nga hëna e plotë, e cila pritet të ndikojë në rritjen e nivelit të ujit dhe përkeqësimin e përmbytjeve bregdetare.
Në Nju Xhersi, rrugët dhe shtëpitë janë përmbytur në disa komunitete, përfshirë Surf City dhe Manasquan. Guvernatorja Mikie Sherrill u ka bërë thirrje banorëve që ta marrin seriozisht stuhinë dhe të ndjekin udhëzimet e autoriteteve.
Në New York City, autoritetet kanë paralajmëruar për erëra që mund të arrijnë deri në 86 kilometra në orë, me rrezik për rrëzimin e pemëve dhe dëmtimin e linjave të energjisë.
Kryetari i qytetit, Zohran Mamdani, u ka bërë thirrje banorëve të shmangin udhëtimet e panevojshme dhe të mos lëvizin nëpër ujërat e përmbytjeve.
Stuhia ka prekur edhe aktivitetet sportive dhe kulturore. Ndeshja e Boston Red Sox ndaj Chicago Cubs është zhvendosur për të dielën në Florida, ndërsa një ndeshje e futbollit mes New York Red Bulls dhe St. Louis City SC është anuluar.
Gjithashtu është anuluar koncerti i Festivalit Global Citizen në Central Park të New Yorkut, ku pritej të performonin Lauryn Hill, Wyclef Jean dhe John Legend.
Sinjali – aty ku e vërteta flet para lajmit!
