Papa Leo XIV u ka bërë thirrje Shteteve të Bashkuara dhe Iranit që t’i rikthehen tryezës së negociatave, me synimin për t’i dhënë fund konfliktit dhe për të shmangur humbje të mëtejshme jetësh njerëzore.
Në deklaratat e tij, ai theksoi se fokusi nuk duhet të jetë ndryshimi i regjimit në Iran, por gjetja e rrugëve për të çuar përpara vlerat pa sakrifikuar jetë të pafajshme.
“Çështja nuk është nëse regjimi i Iranit duhet të ndryshohet apo jo, por si të përparojmë vlerat në të cilat besojmë pa humbur kaq shumë jetë të pafajshme”, u shpreh ai.
Duke folur për gazetarët, Papa nënvizoi qëndrimin e tij kundër luftës.
“Si pastor, nuk mund të jem pro luftës. Do të doja t’i inkurajoja të gjithë të gjejnë përgjigje që burojnë nga një kulturë paqeje, jo nga urrejtja dhe përçarja”, tha ai.
Papa Leo XIV deklaroi se dënon çdo akt të padrejtë, duke përfshirë edhe dënimin me vdekje.
“Unë dënoj privimin nga jeta njerëzore. Unë dënoj dënimin me vdekje. Besoj se jeta njerëzore duhet të respektohet dhe se jeta e çdo individi, nga ngjizja deri në vdekjen natyrore, duhet të mbrohet”, u shpreh ai.
Sinjali – aty ku e vërteta flet para lajmit!
