Ish-presidentja e Kosovës, Vjosa Osmani, ka kujtuar kolonel Ahmet Krasniqin në përvjetorin e vrasjes së tij, duke kërkuar drejtësi për zbardhjen e rastit.
Osmani ka thënë se Krasniqi ishte një ushtarak që jetën dhe dijen e tij ia kushtoi Kosovës dhe lirisë së saj.
“Sot, në përvjetorin e vrasjes së kolonel Ahmet Krasniqit, përulemi me respekt para kujtimit të një ushtaraku që jetën dhe dijen e tij ia kushtoi Kosovës dhe lirisë së saj”, ka shkruar ajo.
Sipas Osmanit, Krasniqi ishte ndër personat që në ditët më të vështira nuk u tërhoqën para përgjegjësisë historike.
Ajo ka theksuar se koloneli punoi për ndërtimin e strukturave ushtarake që, siç ka shkruar ajo, do ta mbronin popullin dhe idealin e lirisë.
“U vra në një kohë kur Kosova kishte më shumë se kurrë nevojë për njerëz të përkushtuar ndaj saj. Por vrasja nuk e vrau idealin për të cilin ai jetoi”, ka deklaruar Osmani.
Ish-presidentja ka thënë se Kosova e lirë dhe shteti i saj janë dëshmia se sakrifica e Krasniqit nuk ishte e kotë.
Në reagimin e saj, Osmani ka kërkuar që kujtimi për Krasniqin të shoqërohet edhe me kërkesën për drejtësi.
“Një shtet që respekton të rënët e vet nuk pajtohet kurrë me heshtjen për vrasjet e tyre. E vërteta dhe drejtësia janë detyrim ndaj historisë, ndaj familjes së tij dhe ndaj brezave që do të vijnë”, ka shkruar ajo.
Në fund, Osmani ka bërë homazhin e saj për kolonelin.
“Lavdi e përjetshme kolonel Ahmet Krasniqit”, ka përfunduar ajo.
Sinjali – aty ku e vërteta flet para lajmit!
