Një 50-vjeçar është arrestuar në Shkodër gjatë një operacioni të zhvilluar për goditjen e një grupi të dyshuar për trafik të lëndëve narkotike, raportojnë mediat në Shqipëri.
Sipas raportimeve të mediave shqiptare, në pranga ka rënë Bledar Cafi, 50 vjeç, i cili është arrestuar në banesën e tij gjatë orëve të para të mëngjesit.
Për Cafin, Gjykata e Posaçme kishte caktuar masën e sigurisë “arrest me burg”, ndërsa ndaj tij rëndojnë dyshime për vepra penale që lidhen me trafikimin e lëndëve narkotike dhe grupin e strukturuar kriminal.
Gjatë operacionit, policia ka kontrolluar edhe banesat dhe pronat që i përkasin Indrit Dokles, 43 vjeç, i cili është shpallur në kërkim që prej vitit 2024.
Megjithatë, Dokle nuk është gjetur në banesë dhe ka mundur t’i shpëtojë arrestimit. Policia vijon kërkimet për lokalizimin dhe kapjen e tij.
Operacioni është zhvilluar në Shkodër nga strukturat e Policisë së Shtetit dhe Byrosë Kombëtare të Hetimit (BKH), nën drejtimin e Prokurorisë së Posaçme (SPAK).
Sinjali – aty ku e vërteta flet para lajmit!
