Një studim i ri sugjeron se, për personat që nuk arrijnë numrin e rekomanduar të hapave, ecja me ritëm më të shpejtë mund të ketë përfitime të ngjashme për shëndetin.
Nëse përpiqeni të arrini 10 mijë hapa në ditë, por nuk ia dilni, mund të ketë një mënyrë tjetër për të përfituar nga ecja: të ecni më shpejt, ka shkruar CNN.
Një studim i publikuar në British Journal of Sports Medicine ka zbuluar se ecja me ritëm më të shpejtë mund të lidhet me uljen e rrezikut për vdekje të hershme, edhe kur numri i hapave është më i ulët.
Studiuesit analizuan të dhënat e më shumë se 100 mijë të rriturve të moshës së mesme në Britani. Pjesëmarrësit mbanin pajisje për matjen e aktivitetit për shtatë ditë, ndërsa studiuesit analizuan si numrin e hapave, ashtu edhe ritmin e ecjes.
Rezultatet treguan se si ecja më shumë, ashtu edhe ecja më shpejt, lidhen me një rrezik më të ulët të vdekjes.
10 mijë hapa nuk janë domosdoshmëri
Synimi prej 10 mijë hapash në ditë nuk bazohet në një zbulim specifik shkencor. Ai e ka origjinën në një fushatë japoneze për promovimin e pedometrave në vitet 1960.
Sipas Emmanuel Stamatakis, një prej autorëve të studimit, për disa njerëz ky numër mund të duket i paarritshëm.
“Dikush që ecën 4 mijë hapa në ditë, por i bën ata me më shumë ritëm, po bën diçka të vlefshme. Edhe personat që nuk mund të ecin shpejt mund të përfitojnë shumë duke bërë më shumë hapa me një ritëm më të ngadaltë”, ka thënë ai.
Studimi tregoi se personat që bënin më pak se 5 mijë hapa në ditë, por arrinin një ritëm prej të paktën 80 hapash në minutë gjatë periudhës së tyre më aktive, kishin rrezik dukshëm më të ulët për vdekje sesa ata që ecnin me ritëm më të ngadaltë.
Megjithatë, rreziku më i ulët u vu re te personat që bënin 7 500 deri në 10 mijë hapa në ditë, pavarësisht ritmit të ecjes.
Për njerëzit që bëjnë më pak se 7 500 hapa, ecja me ritëm më të shpejtë për të paktën 30 minuta në ditë u shoqërua me ulje të mëtejshme të rrezikut.
Sa shpejt duhet të ecni?
Nuk ekziston një ritëm ideal për të gjithë. Ritmi varet nga mosha, forma fizike, gjatësia dhe pesha e personit.
“Nuk ka një ritëm të vetëm që i përshtatet të gjithëve. Intensiteti është gjithmonë relativ me gjendjen fizike të personit”, ka thënë Stamatakis.
Një mënyrë e thjeshtë për të kuptuar nëse po ecni me ritëm të mjaftueshëm është të vëzhgoni trupin: frymëmarrja duhet të bëhet më e rënduar dhe duhet të ndiheni më të ngrohtë, por ende duhet të jeni në gjendje të flisni me fjali të shkurtra.
Nëse dëshironi ta matni ritmin, mund të numëroni hapat për 15 sekonda dhe t’i shumëzoni me katër. Rreth 100 hapa në minutë konsiderohet një pikë orientuese për ecje me intensitet të moderuar te një i rritur mesatar, por ritmi i përshtatshëm ndryshon nga personi në person.
Më e rëndësishmja është të jeni të rregullt
Sipas ekspertëve nuk ka nevojë të bëni ndryshime të mëdha menjëherë. Nëse nuk jeni mësuar me ecje të shpejtë, mund ta rrisni gradualisht kohën.
Phil Chilibeck, profesor i kinesiologjisë në Universitetin e Saskatchewan, sugjeron të shtohen një deri në tre minuta ecje të shpejtë në ditë, duke e përshtatur ritmin sipas vështirësisë që ndjeni.
Nëse ju mungon koha, ecja më e shpejtë për një distancë më të shkurtër mund të jetë një alternativë ndaj ecjes së ngadaltë për një distancë më të gjatë.
Daniel Lieberman, profesor në Harvard, thekson se studimi nuk mund të provojë se ecja e shpejtë është drejtpërdrejt shkaku i uljes së rrezikut, pasi studimi ishte vëzhgues. Megjithatë, sipas tij, rezultatet kanë kuptim, sepse sasia e aktivitetit fizik varet nga kohëzgjatja, intensiteti dhe shpeshtësia e tij.
“Çdo aktivitet fizik është më i mirë se asnjë aktivitet. Dhe është mirë ta ndryshoni rutinën: edhe pak aktivitet më intensiv është i dobishëm”, ka thënë Lieberman.
Sinjali – aty ku e vërteta flet para lajmit!
