Një grua 102-vjeçare ka humbur jetën pas përmbytjeve të mëdha të shkaktuara nga reshjet e dendura në Madrigueras, në provincën e Albacetes në Spanjë.
Sipas autoriteteve, në zonë janë regjistruar rreth 142 litra shi për metër katror, ndërsa niveli i ujit në banesën ku u gjet viktima kishte arritur në rreth një metër.
Ekipet e emergjencës kanë realizuar rreth 90 operacione shpëtimi, kryesisht për banorët që kishin mbetur të bllokuar në shtëpitë e përfshira nga uji.
Kryeministri spanjoll, Pedro Sánchez, ka shprehur ngushëllimet për familjen e viktimës dhe solidaritetin me banorët e prekur nga përmbytjet.
Ndërkohë, Garda Civile po vazhdon punën për pastrimin dhe rehabilitimin e zonave të dëmtuara.
Autoritetet kanë paralajmëruar se moti i keq do të vazhdojë edhe gjatë fundjavës. Të shtunën priten reshje të dendura dhe stuhi, veçanërisht në Tarragona, ku në disa zona është lëshuar alarm i kuq.
Të dielën priten reshje dhe stuhi të tjera, ndërsa ekziston mundësia e formimit të fenomenit DANA, i cili mund të sjellë reshje shumë të dendura dhe përmbytje në pjesë të ndryshme të Spanjës.
Sinjali – aty ku e vërteta flet para lajmit!
