Mesfushori i Liverpoolit, Wataru Endo, ka vendosur t’i japë fund aventurës së tij me kombëtaren e Japonisë, pasi u largua nga ekipi i përzgjedhur për Kupën e Botës vetëm pak orë përpara nisjes së turneut.
Futbollisti 33-vjeçar ishte përfshirë fillimisht në listën prej 26 lojtarësh të grumbulluar nga Japonia dhe në fund të muajit maj ishte rikthyer në aksion në ndeshjen miqësore kundër Islandës, pas një mungese të gjatë.
Rikthimi kishte një domethënie të veçantë për Endon, i cili kaloi disa muaj jashtë fushave si pasojë e një operacioni të kryer në shkurt për shkak të një dëmtimi serioz në këmbë. Ai u lëndua gjatë një sfide të Ligës Premier ndaj Sunderlandit, çka i mbylli sezonin para kohe.
Takimi ndaj Islandës rezultoi të ishte edhe ndeshja e tij e fundit me fanellën e Japonisë. Të enjten në mbrëmje, mesfushori me përvojë konfirmoi zyrtarisht tërheqjen nga futbolli ndërkombëtar.
“Siç është bërë e ditur, nuk do të jem më pjesë e skuadrës për Kupën e Botës. Pas dëmtimit kam punuar maksimalisht për t’u rikthyer dhe ndihem i qetë me gjithçka që kam bërë, pa asnjë pendesë”, u shpreh Endo.
Ai pranoi se mungesa në Botëror është zhgënjyese, por theksoi se ndihet krenar për rrugëtimin dhe progresin e ekipit që nga Kupa e Botës në Katar.
“Si kapiten pata nderin të drejtoj këtë grup dhe të ndihmoj që ëndrra për ta fituar Kupën e Botës të shndërrohej në një objektiv real për të cilin të gjithë besonim”, deklaroi ai.
Gjatë periudhës 2015–2026, Endo regjistroi 73 paraqitje me përfaqësuesen japoneze dhe realizoi katër gola, duke lënë pas një karrierë të rëndësishme në arenën ndërkombëtare.
Sinjali – aty ku e vërteta flet para lajmit!
