Një makinë-bombë ka shpërthyer para një stacioni policor në qytetin Ojocaliente të shtetit Zacatecas në Meksikë, duke lënë të plagosur gjashtë persona.
Sekretari i Qeverisë së Zacatecasit, Rodrigo Reyes, deklaroi se lënda shpërthyese ishte vendosur në një automjet privat. Nga shpërthimi u dëmtuan ndërtesa e stacionit policor dhe disa prona përreth.
“Raportohet se gjashtë civilë janë plagosur dhe po marrin trajtim mjekësor”, tha Reyes.
Zacatecasi konsiderohet zonë strategjike për trafikimin e drogës, pasi lidh pjesën qendrore të Meksikës me veriun dhe perëndimin e vendit. Nëpër këtë shtet kalojnë rrugë të rëndësishme që përdoren për kontrabandimin e kokainës dhe lëndëve të tjera narkotike drejt Shteteve të Bashkuara.
Rajoni është përballur prej vitesh me dhunë të rëndë të lidhur me grupet kriminale. Në korrik, pesë persona, mes tyre një ish-kryetar komune, zyrtarë dhe biznesmenë, u gjetën të varur në një urë në Pozos de Gamboa, rreth 75 kilometra larg Ojocalientes.
Sinjali – aty ku e vërteta flet para lajmit!
