Seriali i njohur turk “Lugina e Ujqërve” është përfshirë në një hetim të rihapur në Turqi, ku autoritetet po shqyrtojnë nëse disa elemente të serialit kanë pasur lidhje me ngjarje reale ose struktura të caktuara.
Hetimi lidhet me vdekjen e Kaşif Kozinoğlu, ish-oficer i Organizatës Kombëtare të Inteligjencës së Turqisë (MIT), i cili vdiq në burgun e Silivrit në nëntor të vitit 2011.
Në kuadër të hetimit po shqyrtohet edhe mundësia e ndonjë lidhjeje mes produksionit të serialit dhe FETO-s, emërtim që autoritetet turke përdorin për rrjetin e lidhur me Fethullah Gülenin.
Një nga elementet që ka tërhequr vëmendjen e autoriteteve është një episod i transmetuar më 10 nëntor 2011, vetëm dy ditë para vdekjes së Kozinoğlut.
Në episod shfaqet personazhi Kazım Kaşifoğlu, i cili mbahet në një qeli dhe kërcënohet me vdekje. Ngjashmëria mes emrit të personazhit dhe rrethanave të rastit real është një prej pikave që po analizohet.
Hetuesit po shqyrtojnë edhe elemente të tjera të serialit, përfshirë disa targa automjetesh që përmbajnë shkronjat “FG”.
Materialet janë dërguar për analizë te një panel ekspertësh të jashtëm, ndërsa tre skenaristët e serialit, Raci Şaşmaz, Bahadır Özdener dhe Cüneyt Aysan, janë marrë në pyetje si dëshmitarë dhe jo si të dyshuar.
Şaşmaz ka mohuar çdo lidhje të produksionit me organizata apo grupe kriminale, duke deklaruar se seriali nuk kishte lidhje me ndonjë fuqi apo strukturë të tillë.
Ai ka mohuar gjithashtu që vdekja e personazhit në serial të ketë qenë e lidhur me vdekjen e Kozinoğlut, duke thënë se bëhej fjalë vetëm për zhvillimin e një historie fiktive.
Deri më tani, nuk është marrë ndonjë vendim përfundimtar dhe tre skenaristët nuk janë shpallur të dyshuar.
Hetimi po vazhdon për të përcaktuar nëse ekziston ndonjë lidhje mes përmbajtjes së serialit dhe rrethanave që lidhen me vdekjen e ish-zyrtarit të MIT.
Sinjali – aty ku e vërteta flet para lajmit!
