Në Gjykatën Themelore në Prishtinë Departamenti për Krime të rënda, ka dështuar të mbahet seanca gjyqësore ndaj Princ Valentino Corleones, pasi Policia nuk e ka ekzekutuar urdhrin e Gjykatës për sjelljen e tij në seancë.
Vali Corleone nuk është paraqitur para Gjykatës, ndonëse për sigurimin e pranisë së tij ishte lëshuar urdhër për sjellje të detyrueshme.
Mosekzekutimi i këtij urdhri ka nxitur reagimin e gjykatësit të rastit, i cili paralajmëroi se lidhur me këtë çështje do ta njoftojë drejtorin e Stacionit Policor në Gjilan.
Gjyqtari kërkoi sqarime për arsyen pse urdhri gjyqësor nuk ishte zbatuar dhe pse i akuzuari nuk ishte sjellë në sallën e gjykimit.
Për shkak të mungesës së Vali Corleones, nuk u plotësuan kushtet për vazhdimin e shqyrtimit gjyqësor. Rrjedhimisht, Gjykata u detyrua ta shtyjë seancën për një datë tjetër.
Gjykata pritet të ndërmarrë masa të mëtejshme për sigurimin e pranisë së të akuzuarit, në mënyrë që procesi të mund të vazhdojë pa pengesa të tjera.
Vali Corleone kishte munguar edhe në seancën paraprake, ndërsa ishte paralajmëruar se, në rast të një mungese tjetër, ndaj tij mund të ndërmerreshin masa për sigurimin e pranisë në Gjykatë.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
Sinjali – aty ku e vërteta flet para lajmit!
