Komisioni Qendror i Zgjedhjeve u ka bërë thirrje qytetarëve të Kosovës që jetojnë jashtë vendit të regjistrohen sa më parë për të marrë pjesë në zgjedhjet e parakohshme parlamentare të 7 qershorit.
Sipas KQZ-së, afati për regjistrimin e votuesve nga diaspora përfundon më 17 maj, ndërsa deri tani janë regjistruar afro 99 mijë qytetarë për të votuar nga jashtë Kosovës.
“Kanë mbetur vetëm edhe dy ditë për regjistrim. Deri më tani kanë aplikuar 98 mijë e 957 votues nga diaspora”, njoftoi KQZ-ja.
Institucioni zgjedhor apeloi që mërgimtarët të shfrytëzojnë kohën e mbetur për të përfunduar procedurat e regjistrimit dhe për të siguruar pjesëmarrjen në procesin zgjedhor.
Ndërkohë, gjatë ditës së sotme KQZ-ja ka zhvilluar edhe shortin për caktimin e numrave të subjekteve politike që do të garojnë në zgjedhjet parlamentare të 7 qershorit.
Zgjedhjet e ardhshme konsiderohen të rëndësishme për shkak të situatës politike në vend dhe interesimit të lartë të diasporës për pjesëmarrje në votim.
Sinjali – aty ku e vërteta flet para lajmit!
