Koreja e Veriut ka miratuar një ndryshim të ri kushtetues që parashikon aktivizimin automatik të një sulmi bërthamor në rast se udhëheqësi Kim Jong Un vritet ose sistemi i komandës së vendit vihet në rrezik.
Sipas raportimeve ndërkombëtare, amendamenti është miratuar gjatë një seance të Asamblesë Supreme Popullore në Phenian dhe përcakton se çdo sulm ndaj strukturës së udhëheqjes do të konsiderohet kërcënim i drejtpërdrejtë për shtetin, duke aktivizuar përgjigje bërthamore të menjëhershme.
Në dokumentin e përditësuar thuhet se “nëse sistemi i komandës dhe kontrollit mbi forcat bërthamore të shtetit vihet në rrezik nga sulmet e forcave armiqësore, një sulm bërthamor do të nisë automatikisht dhe menjëherë”.
Raportet gjithashtu bëjnë të ditur se ndryshimet kushtetuese pasqyrojnë një qasje më të ashpër të Phenianit ndaj Koresë së Jugut, duke e trajtuar atë zyrtarisht si shtet të ndarë dhe duke hequr çdo referencë për ribashkim.
Sinjali – aty ku e vërteta flet para lajmit!
