Kina ka paralajmëruar Shtetet e Bashkuara se mund të anulojë samitin e planifikuar mes presidentit kinez Xi Jinping dhe presidentit amerikan Donald Trump, nëse Uashingtoni miraton shitje të reja armësh për Tajvanin.
Sipas burimeve të cituara nga agjencia japoneze e lajmeve Kyodo News, Pekini e ka përsëritur se çështja e Tajvanit përbën një “vijë të kuqe” në marrëdhëniet me SHBA-në. Xi pritet të takohet me Trumpin në Shtëpinë e Bardhë më 24 shtator, në atë që do të ishte takimi i tyre i tretë ballë për ballë brenda një viti.
Paralajmërimi vjen në një kohë kur administrata amerikane po përgatitet për samitin, të cilit Trump i ka kushtuar rëndësi të veçantë. Anulimi i takimit do të përbënte një goditje diplomatike për presidentin amerikan, veçanërisht në prag të zgjedhjeve të ndërmjetme në SHBA, raporton YahooNews.
Pekini reagoi ashpër edhe ndaj paketës së armëve për Tajvanin, me vlerë rreth 11 miliardë dollarë, të njoftuar nga administrata Trump në dhjetor të vitit të kaluar. Kina e konsideron Tajvanin pjesë të territorit të saj dhe kundërshton çdo furnizim amerikan me armë për ishullin.
Ndërkohë, tensionet rreth Tajvanit janë rritur, pasi Kina ka shtuar aktivitetin ushtarak në dhe përreth ngushticës. Çështja pritet të jetë ndër temat kryesore të takimit Trump-Xi, së bashku me luftën dhe tensionet mes SHBA-së dhe Iranit.
Pavarësisht përplasjeve, të dyja palët duket se synojnë të shmangin hapa që mund të rrezikojnë marrëdhëniet tregtare mes dy ekonomive më të mëdha në botë.
Sinjali – aty ku e vërteta flet para lajmit!
