Policia ka realizuar dy ekstradime nga Gjermania dhe Hungaria drejt Kosovës, në kuadër të bashkëpunimit ndërkombëtar për luftimin e kriminalitetit dhe zbatimin e urdhrave ndërkombëtarë të arrestit.
Sipas njoftimit të Policisë së Kosovës, më 12 gusht 2026, nga Gjermania është ekstraduar në Kosovë shtetasi kosovar me inicialet M.T., i cili kërkohej nga institucionet e drejtësisë në bazë të një urdhërarresti ndërkombëtar.
M.T. dyshohet se është i përfshirë në veprën penale “blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”.
“Pas ekstradimit, i dyshuari iu dorëzua njësive përkatëse të policisë nga DRP Prishtinë për procedura të mëtejshme ligjore”, thuhet në njoftimin e Policisë.
Ndërkaq, më 13 gusht 2026, nga Hungaria është ekstraduar drejt Kosovës shtetasi i Serbisë me inicialet I.S., i cili po ashtu kërkohej me urdhërarrest ndërkombëtar të lëshuar nga institucionet e drejtësisë.
Edhe ndaj tij ekziston dyshimi për përfshirje në veprën penale “blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”.
Policia bëri të ditur se pas ekstradimit, edhe I.S. iu dorëzua njësive përkatëse të Policisë së Kosovës në kuadër të Drejtorisë Rajonale të Policisë në Prishtinë, për vazhdimin e procedurave ligjore.
Sipas Policisë së Kosovës, të dy ekstradimet janë realizuar nga Drejtoria për Bashkëpunim Ndërkombëtar Policor (ILECU), në koordinim me njësitë relevante të Policisë së Kosovës dhe institucionet e drejtësisë.
“Këto ekstradime u mundësuan falë bashkëpunimit të ngushtë ndërmjet institucioneve të Republikës së Kosovës dhe dy shteteve në fjalë”, thuhet në njoftim.
Policia e Kosovës ka theksuar se përmes ILECU-së do të vazhdojë bashkëpunimin dhe shkëmbimin e informacioneve me institucionet vendore, shtetet partnere dhe organizatat ndërkombëtare.
Qëllimi, sipas Policisë, është “parandalimi, hetimi dhe zbulimi i aktiviteteve kriminale”, si dhe lokalizimi dhe arrestimi i personave apo grupeve kriminale që veprojnë brenda dhe jashtë vendit.
Policia e Kosovës nuk ka dhënë detaje të tjera lidhur me rastet apo procedurat gjyqësore ndaj dy të dyshuarve.
