Përfaqësuesja e Lartë e Bashkimit Evropian, Kaja Kallas, ka deklaruar se BE-ja nuk do të pozicionohet si ndërmjetëse neutrale në konfliktin mes Ukrainës dhe Rusisë, duke theksuar se blloku evropian qëndron qartë në mbështetje të Kievit.
Duke folur gjatë një takimi joformal të ministrave të jashtëm të BE-së në Lemesos të Qipros, Kallas tha se Unioni Evropian nuk synon të zëvendësojë Shtetet e Bashkuara në procesin e paqes, por të veprojë në mënyrë plotësuese ndaj përpjekjeve të tyre diplomatike.
“Evropa nuk mund të jetë neutrale midis Rusisë dhe Ukrainës, sepse jemi në anën e Ukrainës dhe po mbrojmë interesat tona të sigurisë”, u shpreh ajo.
Sipas saj, çdo angazhim i BE-së në procesin e negociatave duhet të synojë balancimin e situatës dhe të nxisë lëshime nga pala ruse, pa e marrë rolin kryesor në bisedimet e paqes.
Kallas gjithashtu theksoi se ministrat e jashtëm të BE-së kanë rënë dakord që përpjekjet evropiane duhet të jenë në përputhje me ato të SHBA-së, dhe jo në zëvendësim të tyre.
Ndërkohë, Ukraina ka kërkuar nga Bashkimi Evropian që të fokusohet në hapa konkretë dhe të zbatueshëm për zgjidhjen e çështjeve kyçe, përfshirë sigurinë në centralin bërthamor të Zaporizhzhisë dhe krijimin e korridoreve humanitare.
Sinjali – aty ku e vërteta flet para lajmit!
