Drejtori i Mjekimit Intensiv në Qendrën Klinike Universitare të Kosovës (QKUK), Shaqir Uka, ka folur për gjendjen shëndetësore të punëtorit të lënduar në aksidentin e rëndë të ndodhur një ditë më parë në një kantier ndërtimi në Prishtinë, ku u rrëzua një vinç.
Uka ka bërë të ditur se pacienti ka pësuar lëndime serioze, por për momentin gjendja e tij shëndetësore paraqitet relativisht stabile dhe ai po vazhdon të marrë trajtim mjekësor.
Si pasojë e aksidentit, dy punëtorët që ndodheshin në vinç ranë nga lartësia. Njëri prej tyre, Ermal Sherifi, nuk arriti t’u mbijetojë plagëve dhe ndërroi jetë në QKUK.
Mëngjesin e sotëm, Gazeta Sinjali raportoi ekskluzivisht identitetet e tre personave të arrestuar lidhur me rastin. Bëhet fjalë për Egzon Elshanin, rreth 37 vjeç, Betim Sylejmanin, rreth 34 vjeç, dhe Agon Hashanin, rreth 47 vjeç.
Me urdhër të Prokurorit të Shtetit, Egzon Elshani, Betim Sylejmani dhe Agon Hashani janë ndaluar për 48 orë, nën dyshimin për veprat penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës” dhe “Shkaktimi i rrezikut të përgjithshëm”. Hetimet për zbardhjen e plotë të rrethanave të tragjedisë janë në vazhdim.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
Sinjali – aty ku e vërteta flet para lajmit!
