22 shtatori i 2015-ës është hera e parë kur opozita e asaj kohe, e udhëhequr nga Lëvizja Vetëvendosje, gjuajti ish-kryeministrin Isa Mustafa, i cili po mbante fjalimin për ujdinë e 25 gushtit të arritur në Bruksel.
Vezët e LVV-së krijuan kaos në Kuvend, situatë kjo që Hashim Thaçi, si zëvendës i Mustafës, e priste me buzëqeshje, raporton Klan Kosova.
Rreth dy javë më vonë, Vetëvendosje, Aleanca dhe NISMA bllokuan punën e Kuvendit. Kryeprotagonisti Kurti fishkëllente me filikaçë.
Kur kjo nuk bëri punë, gazi lotsjellës ishte zgjidhja e opozitës që ato ditë kundërshtonin Asociacionin e komunave me shumicë serbe dhe demarkacionin me Malin e Zi.
Gazi lotsjellës ishte pjesë përbërëse e pajisjeve të deputetëve të opozitës gjatë tërë atij viti, duke i fshehur bombolat në vendet më të pazakonshme në trupin e tyre.
Kuvendi mbeti i njëjti edhe në 2016-ën, ndërsa më 19 shkurt u kërkua dorëheqja e qeverisë Mustafa-Thaçi. Shqipe Pantina e LVV-së bëri hedhjen e parë të gazit.
Po atë shkurt, tensione solli edhe çështja e zgjedhjes së presidentit, ku diskutohej që Hashim Thaçi të merrte këtë pozitë.
Disa ditë pas, në ditën kur do të zgjidhej Thaçi president, punimet u ndërprenë përsëri me tym të lotsjellësit. Policia largoi disa deputetë që bënin sherr. Pavarësisht tensioneve, Thaçi u zgjodh president në raundin e tretë me 71 vota.
Pas një pauze në mars, skenari vazhdoi sërish. Kësaj here u aplikuan edhe disa forma të tjera, si pajisje me dritë laser, por kjo gjë u mor më me humor.
Meqë laseri nuk krijoi kaos, siç duket se deshën opozitarët, iu kthyen metodës së vjetër – gazit lotsjellës.
Dy vjet më vonë, më 2018, votimi për gjyqtarët e Gjykatës Kushtetuese mori përmasa të tjera, kësaj here me grushte. Xhavit Haliti i PDK-së u përplas fort me Arben Gashin e LDK-së.
Kuvendi pushoi nga hallakama përsëri dy vjet, deri më 2020, kur ndodhi një tjetër përplasje fizike mes Hajrullah Çekut e Hekuran Muratit të LVV-së me Arben Gashin e LDK-së, pas një debati për personat e pagjetur.
Mirëpo, më 2023, në Kuvend ndodhi një përleshje e bujshme teksa kryeministri Albin Kurti fliste se veriun e ka menaxhuar mirë, e në anën tjetër akuzohej se kishte prishur marrëdhëniet me BE-në e SHBA-në.
Mërgim Lushtaku i hodhi ujë Kurtit, ndërsa Besnik Bislimi reagoi duke hedhur shishe uji në drejtim të Lushtakut.
Më pas, deputetë të PDK-së dhe LVV-së u përfshinë në përleshje, dhe sigurimi ndërhyri për t’i ndarë.
Për krejt këto zhvillime, ndiqeni kronikën e plotë në vijim:
