Një aeroplan luftarak italian F-2000 është goditur gjatë sulmeve në bazën ajrore Ta’if në Arabinë Saudite, ka njoftuar ministri italian i Mbrojtjes, Guido Crosetto.
Crosetto ka bërë të ditur se e ka ndjekur nga afër situatën në bazën ajrore, e cila është përballur me disa sulme dhe ku personeli ushtarak italian është i pranishëm në kuadër të Operacionit Inherent Resolve.
Ai ka theksuar se asnjë pjesëtar i personelit ushtarak italian nuk është përfshirë në incident.
“Gjatë sulmit, u godit një aeroplan italian F-2000. Ai ndodhej brenda bazës, në një zonë të largët. Nuk ka dëme të tjera në automjete apo infrastrukturë të përdorur nga personeli ynë”, tha Crosetto.
Ministri italian ka thënë se ka kërkuar një vlerësim të mëtejshëm të situatës, përfshirë gjendjen e personelit italian dhe opsionet e mundshme operative.
Crosetto ka shtuar se është siguruar që të gjitha masat e nevojshme të sigurisë për mbrojtjen e personelit ushtarak italian ishin vendosur më herët.
“Situata po ndiqet me vëmendjen më të madhe, me qëllim sigurimin e mbrojtjes së plotë të personelit tonë dhe operimin me përgjegjësinë e nevojshme”, tha më tej Crosetto.
Arabia Saudite është përballur ditët e fundit me një seri sulmesh me raketa dhe dronë, të cilat i janë atribuar rebelëve Houthi, në kuadër të përshkallëzimit të tensioneve në rajon.
Ndërkohë, luftimet mes forcave qeveritare të Jemenit dhe rebelëve Houthi janë intensifikuar që nga fillimi i korrikut.
Sinjali – aty ku e vërteta flet para lajmit!
