Një operacion i gjerë antidrogë është finalizuar në Sarandë, pas një hetimi proaktiv dymujor të zhvilluar nga Policia shqiptare në bashkëpunim me Prokurorinë.
Operacioni i koduar “Vjeshta” ka çuar në arrestimin e 20 personave, ndaj të cilëve Gjykata e Sarandës kishte caktuar masën e sigurisë “arrest në burg”.
Gjatë kontrolleve janë sekuestruar dy pistoleta, sasi kokaine dhe kanabisi, katër automjete, 19 telefona celularë, si dhe një shumë parash në lekë dhe euro.
Dy prej të arrestuarve, me inicialet D.S. dhe Sh.B., u kapën me nga një armë zjarri. Pistodhrat do t’u nënshtrohen ekzaminimeve nga Instituti i Policisë Shkencore.
Sipas Policisë, kokaina dhe kanabisi ishin ndarë në dhjetëra doza dhe dyshohet se synoheshin për shitje.
Hetimet për grupin kishin nisur më herët. Më 31 korrik 2026, në kuadër të të njëjtit procedim, ishin arrestuar në flagrancë tre persona dhe ishin sekuestruar rreth pesë kilogramë kanabis, të cilët dyshohej se do të shpërndaheshin në Sarandë dhe Ksamil.
Të dyshuarit besohet se shisnin lëndë narkotike në zona të ndryshme të Sarandës, përfshirë plazhet, lokalet e natës dhe hapësirat pranë shkollave.
Në gjendje të lirë është proceduar edhe një 36-vjeçar nga Lushnja, i cili dyshohet se kundërshtoi policët për të penguar kontrollin në një dhomë hoteli. Aty u kap një prej personave të kërkuar dhe u gjet një armë zjarri.
Hetimet po vazhdojnë nën drejtimin e Prokurorisë së Sarandës për dokumentimin e plotë të veprimtarisë së dyshuar kriminale dhe identifikimin e personave të tjerë të përfshirë.
Sinjali – aty ku e vërteta flet para lajmit!
