Kryetari i Aleancës, Ardian Gjini, ka akuzuar Lëvizjen Vetëvendosje se qëllimisht e ka zvarritur procesin e konstituimit të Kuvendit për të arritur afatin e sotëm, 27 dhjetorin.
Gjini tha se, nga kjo datë, nis afati 60-ditor për zgjedhjen e presidentit, ndërsa më pas mund të pasojë edhe afati deri në 45 ditë për mbajtjen e zgjedhjeve.
“Ju kemi thënë, po e ndjekin datën 27 dhjetor. Prej sot, 60 ditë afat për zgjedhje të presidentit, plus deri në 45 ditë zgjedhjet. Tash e ka 27 dhjetorin që e ka kërkuar”, tha Gjini.
Ai deklaroi se, sipas tij, çështja nuk ka qenë te kandidatët e propozuar nga opozita për nënkryetarë të Kuvendit, por te arritja e afatit.
“Nuk kanë pasur problem as me Vlora Çitakun as me Kujtim Shalën, as me ‘popullin serb’. Problemi ka qenë me e mbërri datën e sotme. Afatin”, u shpreh ai.
Gjini e kritikoi ashpër qasjen e Vetëvendosjes, duke thënë se tashmë qytetarët e kanë kuptuar, sipas tij, se bëhet fjalë për mashtrim dhe manipulim.
“Tashmë qytetarët e dinë se është mashtrues e manipulator”, deklaroi ai.
Në fund, kryetari i Aleancës tha se partia e tij nuk i frikësohet zgjedhjeve dhe kërkoi që ato të mbahen nëse ky është vullneti politik.
“Nëse doni, shkojmë në zgjedhje! Mos u frikësoni prej zgjedhjeve!”, përfundoi Gjini.
Sinjali – aty ku e vërteta flet para lajmit!
