Ministri i Jashtëm gjerman, Johann Wadephul, ka deklaruar se pjesëmarrja e presidentit rus, Vladimir Putin, në samitin e ardhshëm të G20 mund të krijojë mundësi për nisjen e negociatave serioze për përfundimin e luftës në Ukrainë.
Presidenti i Shteteve të Bashkuara, Donald Trump, e ka ftuar Putinin në samitin e radhës të G20, i cili pritet të mbahet në Miami në dhjetor.
Ftesa ka shkaktuar reagime të ndryshme nga liderë evropianë, përfshirë kryeministren italiane, Giorgia Meloni, dhe shefen e politikës së jashtme të Bashkimit Evropian, Kaja Kallas, të cilat kanë shprehur rezerva për pjesëmarrjen e presidentit rus.
Ndryshe është shprehur Wadephul, i cili gjatë një konference për media me homologen e tij kanadeze, Anita Anand, në Ottawa, tha se ftesa mund të shërbejë si një “provë lakmusi” për gatishmërinë e Putinit për të negociuar.
“Ftesa do të jetë një provë lakmusi, edhe për Vladimir Putinin për të negociuar. Pra, këto lloj mundësish duhet të shfrytëzohen. Ne i kemi kërkuar vazhdimisht qeverisë ruse dhe Vladimir Putinit të ulen në tryezën e negociatave. Nëse është një mundësi, atëherë ndoshta do të ishte të paktën një fillim për negociata serioze”, tha Wadephul.
Ai theksoi se për zhvillimin e një dialogu kuptimplotë do të duhej të ekzistonte një armëpushim gjatë bisedimeve.
Ndërkohë, ministrja e Jashtme e Kanadasë, Anita Anand, tha se ishte e befasuar nga ftesa e Trumpit për Putinin, por shtoi se Kanadaja do të marrë pjesë në samit, duke e cilësuar këtë si pjesë të diplomacisë.
Qëndrimi i Wadephul ndryshon nga deklaratat e bëra më herët nga qeveria gjermane. Zëdhënësi i kancelarit Friedrich Merz, Stefan Kornelius, kishte deklaruar se Gjermania nuk i konsideron marrëdhëniet me Rusinë si “punë të zakonshme” dhe se Berlini po koordinon qëndrimin e tij me partnerët.
Ftesa e Shtëpisë së Bardhë shihet si pjesë e përpjekjeve të administratës amerikane për ta rikthyer Moskën në forumet diplomatike ndërkombëtare. Nëse Putin merr pjesë në samit, kjo do të mund të ishte paraqitja e tij e parë në një takim të G20 që nga viti 2019.
Sinjali – aty ku e vërteta flet para lajmit!
