Gjenerali gjerman Carsten Breuer, aktualisht shef i Mbrojtjes së Gjermanisë, është zgjedhur të shtunën kryetar i ardhshëm i Komitetit Ushtarak të NATO-s, autoriteti më i lartë ushtarak i Aleancës.
Breuer u zgjodh nga shefat e mbrojtjes të 32 vendeve anëtare gjatë një takimi të NATO-s në Kopenhagë. Ai do ta marrë detyrën në verën e vitit 2027, duke pasuar admiralin italian Giuseppe Cavo Dragone.
Dragone e ka uruar Breuerin për zgjedhjen, duke vlerësuar përvojën e tij operacionale, njohuritë për NATO-n dhe udhëheqjen e Forcave të Armatosura Gjermane.
Kryetari i Komitetit Ushtarak është zyrtari më i lartë ushtarak i NATO-s dhe këshilltari kryesor ushtarak i sekretarit të përgjithshëm të Aleancës, Mark Rutte. Ai gjithashtu përcjell këshillat e shefave të mbrojtjes të vendeve anëtare te strukturat politike të NATO-s.
Breuer do ta marrë këtë detyrë në një periudhë kur NATO po përshtat prioritetet e saj të mbrojtjes dhe po kërkon që aleatët evropianë dhe Kanadaja të marrin më shumë përgjegjësi për sigurinë e përbashkët.
Sinjali – aty ku e vërteta flet para lajmit!
