Kinematë në Britani po shqyrtojnë mundësinë e ndalimit ose kufizimit të përdorimit të syzeve inteligjente me AI të Meta-s, për shkak të shqetësimeve se ato mund të përdoren për regjistrimin e fshehtë të filmave.
Shoqata e Kinemave të Britanisë (UKCA) ka bërë të ditur se operatorët kryesorë po vlerësojnë mënyrën se si do të reagojnë ndaj kësaj teknologjie, e cila ka kamera të integruara në kornizë dhe mundëson fotografimin dhe regjistrimin e videove në mënyrë diskrete.
Deri tani nuk është vendosur një ndalim i përgjithshëm, pasi kinematë po përpiqen të gjejnë një ekuilibër mes luftës kundër piraterisë, privatësisë dhe përfitimeve që këto pajisje mund të ofrojnë për personat me vështirësi në shikim apo dëgjim.
Syzet e Meta-s kanë fituar popullaritet të madh, me më shumë se 7 milionë palë të shitura vetëm gjatë vitit 2025.
Përveç kamerës, ato mundësojnë komunikimin me AI, dëgjimin e muzikës dhe kryerjen e telefonatave.
Disa biznese në Britani tashmë kanë marrë masa.
Wetherspoons nuk lejon regjistrimin me këto syze në pubet e saj, ndërsa ATG Theatres, që menaxhon disa teatro të mëdha, ka njoftuar se nuk do të lejojë përdorimin e tyre për regjistrime.
Edhe gjykatat britanike e kanë ndaluar përdorimin e syzeve të Meta-s, për shkak të kufizimeve mbi fotografimin dhe filmimin në ambientet gjyqësore.
Nga ana tjetër, Meta kundërshton kufizimet e përgjithshme, duke theksuar se syzet mund të jenë një ndihmë e rëndësishme për personat me probleme të shikimit.
Kompania argumenton gjithashtu se pajisjet kanë një dritë treguese që ndizet gjatë fotografimit ose regjistrimit, për t’i njoftuar njerëzit për përdorimin e kamerës.
Sinjali – aty ku e vërteta flet para lajmit!
