Mbretëria e Bashkuar i ka bërë thirrje Izraelit që të lejojë hyrjen e më shumë ndihmave humanitare në Rripin e Gazës, duke paralajmëruar për nevojën urgjente të popullsisë për ushqim dhe ndihma të tjera.
Ministri britanik për Lindjen e Mesme, Stephen Doughty, e bëri këtë thirrje gjatë vizitës së tij në objektet e ndihmës në el-Arish të Egjiptit, raporton Al Jazeera, përcjell Gazeta Sinjali.
Doughty kërkoi nga qeveria izraelite që të heqë pengesat për hyrjen e ndihmave dhe të sigurojë që ato të shpërndahen në Gaza në mënyrë të shpejtë dhe të sigurt.
Sipas një deklarate të Qeverisë britanike, përcjell Gazeta Sinjali, ministri theksoi se rritja e ndihmave është e domosdoshme për të parandaluar vuajtjet e mëtejshme të palestinezëve në Gaza.
Britania ka bërë të ditur gjithashtu se po punon ngushtë me Egjiptin për të ndërmarrë hapa praktikë që do të ndihmonin në rritjen e rrjedhës së ndihmave drejt Gazës.
Doughty tha se kjo është një nga arsyet pse Mbretëria e Bashkuar po mbështet përpjekjet diplomatike për t’i dhënë fund konfliktit dhe për të arritur paqe, stabilitet dhe siguri në Gaza.
Ndërkohë, kriza ushqimore në Gaza vazhdon të jetë alarmante. Sipas të dhënave më të fundit të IPC-së (Integrated Food Security Phase Classification), mbi 1.2 milionë njerëz, apo rreth 59 për qind e popullsisë së Gazës, përballeshin me nivele krize ose më të rënda të pasigurisë ushqimore gjatë periudhës prill-qershor 2026, përcjell Gazeta Sinjali.
Po ashtu, sipas të njëjtit burim, mbi 74 mijë fëmijë nën moshën pesëvjeçare pritet të vuajnë nga kequshqyerja akute deri në prill të vitit 2027.
Të dhënat tregojnë se, edhe pse situata ushqimore ka shënuar përmirësime krahasuar me periudhat më të rënda të krizës, gjendja mbetet jashtëzakonisht e brishtë dhe çdo ndërprerje e furnizimeve me ushqim dhe ndihma mund ta përkeqësojë sërish krizën, sipas IPC-së.
Sinjali – aty ku e vërteta flet para lajmit!
