Presidenti amerikan, Donald Trump, ka ripërsëritur kritikat ndaj Iranit për ekzekutimin e protestuesve, duke deklaruar se regjimi në Teheran nuk po arrin më të financojë pjesë të mëdha të forcave të tij ushtarake dhe po përballet me një krizë humanitare “të përmasave epike”.
“Irani po dështon dhe nuk po paguan pjesë të mëdha të ushtrisë së tij, ndërsa në të njëjtën kohë po vret protestues, madje edhe kur ata nuk po protestojnë, në nivele që nuk janë parë më parë”, shkroi Trump të martën në Truth Social.
“Është një krizë humanitare e përmasave epike dhe duhet të ndalet, tani”, shtoi ai.
Deklaratat e Trumpit vijnë disa ditë pasi 32 shtete, përfshirë Francën, Britaninë e Madhe dhe Kanadanë, dënuan përdorimin e dënimit me vdekje nga Irani për, siç thanë, “heshtjen e kundërshtarëve”.
Më 12 gusht, këto shtete kërkuan ndalimin e menjëhershëm të ekzekutimeve dhe lirimin e personave të ndaluar në mënyrë arbitrare.
Edhe Komisioneri i Lartë i OKB-së për të Drejtat e Njeriut, Volker Türk, ka akuzuar Teheranin se po përdor ekzekutimet për të “krijuar frikë”.
Sipas tij, që nga 19 marsi i këtij viti, të paktën 56 persona janë ekzekutuar për akuza që lidhen me sigurinë kombëtare, ndërsa më shumë se 100 të tjerë rrezikojnë dënimin me vdekje.
Protestat e janarit në Iran shpërthyen pas rënies së fortë të rialit iranian dhe u përhapën në mbi 180 qytete. Shtypja e protestave shkaktoi mijëra viktima.
Sipas organizatave për të drejtat e njeriut, Irani ka shënuar një rritje të madhe të ekzekutimeve. Vetëm gjatë vitit 2025, të paktën 1,639 persona u ekzekutuan, shifra më e lartë vjetore që nga viti 1989.
Sinjali – aty ku e vërteta flet para lajmit!
