Autoritetet në Finlandë kanë bërë të ditur se një dron i paidentifikuar dyshohet të ketë hyrë në hapësirën ajrore të vendit në zonën e Virolahtit, pranë kufirit me Rusinë.
Sipas Ministrisë finlandeze të Mbrojtjes, droni është pikasur nga Forcat Ajrore në orët e para të mëngjesit të 3 majit, ndërsa origjina dhe modeli i tij mbeten ende të panjohura.
Autoritetet kanë konfirmuar se fluturakja nuk ndodhet më në hapësirën ajrore të Finlandës, ndërsa rasti është duke u hetuar nga roja kufitare.
Finlanda, e cila ndan një kufi të gjatë me Rusinë, ka qenë më herët e përballur me incidente të ngjashme, në një kohë kur tensionet në rajon mbeten të larta.
Ndërkohë, Ministria ruse e Mbrojtjes ka njoftuar se sistemet e saj të mbrojtjes ajrore kanë rrëzuar qindra dronë ukrainas gjatë natës në disa rajone të vendit, përfshirë zona pranë Shën Petersburg.
Rasti i fundit në Finlandë shton shqetësimet për sigurinë ajrore në Evropë, ndërsa hetimet për incidentin janë në vazhdim.
Sinjali – aty ku e vërteta flet para lajmit!
