Komisioni Evropian ka deklaruar se migrantët që hynë ilegalisht në enklavën spanjolle Ceuta nuk kanë kaluar drejt Evropës kontinentale dhe nuk do të mund të lëvizin lirshëm në vendet e tjera të Bashkimit Evropian.
“Për momentin nuk ka lëvizje të mëtejshme drejt kontinentit evropian”, ka thënë një zyrtar i BE-së, duke theksuar se rregullat e zonës Schengen nuk vlejnë për personat që kanë hyrë në mënyrë të parregullt, raporton Euronews, transmeton Sinjali.
Kriza e papritur e migracionit në Ceuta ka shkaktuar reagime të forta në Evropë, ndërsa disa vende të BE-së kanë kërkuar edhe pezullimin e Spanjës nga zona Schengen, duke e akuzuar Madridin se nuk ka mbrojtur si duhet kufijtë e jashtëm të unionit.
Rreth 60 mijë migrantë, kryesisht nga Maroku, kaluan kufirin drejt Ceutës në valën më të madhe të hyrjeve të parregullta të regjistruara ndonjëherë në territorin e BE-së.
Komisioni Evropian sqaroi se, edhe pse Ceuta është territor spanjoll, ajo trajtohet si kufi i jashtëm i BE-së dhe kontrollet për personat që largohen nga enklava mbeten në fuqi.
Migrantët që kanë hyrë pa autorizim nuk mund të udhëtojnë me traget apo avion drejt Spanjës kontinentale pa kaluar më parë kontrolle identifikimi. Në rast se kërkojnë azil, ata mund t’i nënshtrohen procedurave të përshpejtuara dhe nuk lejohen të largohen nga Spanja derisa të merret një vendim.
Sipas rregullave të BE-së, vetëm personat që marrin mbrojtje ndërkombëtare kanë të drejtë të lëvizin në zonën Schengen. Ndërkohë, Maroku konsiderohet “vend i sigurt i origjinës”, dhe qytetarët e tij kanë një shkallë shumë të ulët të pranimit të kërkesave për azil – rreth 6 për qind.
Autoritetet spanjolle kanë bërë të ditur se pothuajse gjysma e personave që hynë në Ceuta të enjten tashmë janë kthyer vullnetarisht në Marok.
Sinjali – aty ku e vërteta flet para lajmit!
