Bashkimi Evropian është bërë gati t’i ofrojë Ukrainës 6.1 miliardë euro asistencë, kryesisht për blerjen e pajisjeve ushtarake, përfshirë sistemet dhe interceptuesit “Patriot”, të cilët i nevojiten Kievit për t’u mbrojtur nga raketat balistike ruse.
Financimi, i njoftuar këtë të premte, do të vijë nga paketa e huasë mbështetëse prej 90 miliardë eurosh e Bashkimit Evropian për Ukrainën. Kjo paketë parashikon 28 miliardë euro për ndihmë ushtarake dhe 16 miliardë euro të tjera për mbështetjen e buxhetit brenda vitit.
Për prokurimin e sistemeve “Patriot”, të cilat prodhohen në Shtetet e Bashkuara, si dhe të dronëve që varen nga pjesë përbërëse kineze, do të hiqen disa prej kritereve të huasë.
Ndihma prej 6.1 miliardë eurosh përbën lëvrimin e fundit në kuadër të paketës prej 28 miliardë eurosh për mbështetjen ushtarake të Ukrainës.
Pagesat po bëhen në mënyrë graduale, pasi Brukseli po kontrollon dhe verifikon kontratat që Kievi nënshkruan me kompanitë private. Deri tani, Ukrainës i janë transferuar 8.35 miliardë euro fonde për mbrojtjen.
“Ushtria ukrainase varet ndjeshëm nga pajisja me produkte kritike që kërkojnë sasi të veçanta brenda një kohe të shkurtër. Ndaj, ndihma e BE-së mbetet jetike”, ka deklaruar komisioneri evropian për Mbrojtjen, Andrius Kubilius, në një konferencë shtypi.
Sinjali – aty ku e vërteta flet para lajmit!
