Një shpërthim i infeksionit me salmonelë i lidhur me konsumimin e nudllave instant me shije ka prekur të paktën 106 persona në 14 shtete evropiane, sipas njoftimeve nga Autoriteti Evropian për Sigurinë Ushqimore (EFSA) dhe Qendra Evropiane për Parandalimin dhe Kontrollin e Sëmundjeve (ECDC).
Sipas autoriteteve shëndetësore, shumica e të infektuarve janë fëmijë dhe të rinj, ndërsa 49 persona janë shtruar në spital për shkak të komplikimeve të shkaktuara nga infeksioni.
Rastet janë raportuar në Austri, Britani të Madhe, Çeki, Danimarkë, Estoni, Francë, Gjermani, Hungari, Letoni, Lituani, Holandë, Norvegji, Poloni dhe Suedi.
Hetimet epidemiologjike kanë lidhur disa prej rasteve në vende të ndryshme me konsumimin e një produkti të njëjtë të nudllave me shije, i prodhuar nga një kompani në Ukrainë. Ndërkohë, kompania Reeva Foods ka tërhequr nga tregu disa seri të produktit të shpërndarë në vendet baltike dhe ka nisur analiza të brendshme në bashkëpunim me autoritetet.
Autoritetet evropiane theksojnë se masat e marra për tërheqjen e produkteve nga tregu pritet të ulin rrezikun e përhapjes së mëtejshme të infeksionit.
Salmoneloza është një infeksion bakterial që shkakton simptoma si diarre, temperaturë, dhimbje barku, të përziera dhe të vjella, dhe mund të jetë më i rrezikshëm për fëmijët, të moshuarit dhe personat me imunitet të dobësuar.
Sinjali – aty ku e vërteta flet para lajmit!
