Një alpinist britanik 28-vjeçar ka humbur jetën pasi ka rënë rreth 60 metra nga mali Torrecerredo, një nga majat më të larta në Spanjën veriore.
Sipas Gardës Civile Spanjolle, alpinisti ra në një përrua teksa po zbriste nga maja e Torrecerredos, në Malet Cantabria, të enjten. Aksidenti ndodhi rreth 20 metra larg majës së malit.
Shërbimet e emergjencës u njoftuan rreth orës 13:27 sipas kohës lokale. Në vendngjarje u dërguan njësi policore dhe një njësi ajrore, ndërsa një grup i specializuar i shpëtimit malor u angazhua për nxjerrjen e trupit.
Shërbimet spanjolle të emergjencës thanë se fillimisht morën një telefonatë për një person që kishte rënë në faqen lindore të malit. Një grup shpëtimi u dërgua me helikopter mjekësor, ndërsa një mjek që ishte pjesë e ekipit konfirmoi vdekjen e alpinistit rreth orës 14:18.
Mjeku qëndroi në vendngjarje për të ruajtur trupin deri në mbërritjen e një helikopteri të Gardës Civile, rreth një orë e 20 minuta më vonë.
Më pas, shpëtuesit e specializuar malorë u ulën me vinç në vendin e aksidentit, ku nxorën trupin dhe sendet personale të viktimës.
Identiteti i alpinistit nuk është bërë publik. Autoritetet spanjolle kanë bërë të ditur se ai ishte shtetas anglez.
Ministria e Jashtme e Mbretërisë së Bashkuar tha se ishte në kontakt me autoritetet lokale “pas raportimeve për vdekjen e një shtetasi britanik në Spanjë”.
Sinjali – aty ku e vërteta flet para lajmit!
