Këshilli Gjyqësor i Kosovës ka zgjedhur sot Afërdita Bytyqin në pozitën e zëvendëskryesueses së KGJK-së, pas një gare të ngushtë me anëtarin tjetër të Këshillit, Artan Abazi.
Bytyqi, e cila është gjyqtare në Gjykatën e Apelit dhe anëtare e KGJK-së, ka marrë besimin e shumicës së anëtarëve të Këshillit në votimin e zhvilluar në mbledhjen e së enjtes.
Në votim kanë marrë pjesë 11 anëtarë, ndërsa rezultati ka qenë tejet i ngushtë: gjashtë vota për Afërdita Bytyqin dhe pesë për kundërkandidatin e saj, Artan Abazi.
Me këtë rezultat, Bytyqi është zgjedhur zëvendëskryesuese e organit më të lartë përgjegjës për administrimin e sistemit gjyqësor në vend.
Mandati i saj në këtë pozitë nis sot, më 27 gusht 2026, dhe do të zgjasë tri vjet.
Pas zgjedhjes, Bytyqi ka falënderuar anëtarët e Këshillit për besimin e dhënë dhe është zotuar për bashkëpunim dhe angazhim në avancimin e sistemit të drejtësisë, me fokus edhe në rritjen e transparencës së KGJK-së.
Gara mes Bytyqit dhe Abazit për këtë pozitë ishte hapur më herët, ndërsa zgjedhja e zëvendëskryesuesit ishte diskutuar edhe në mbledhjen e KGJK-së të mbajtur në korrik. Atëkohë, pasi ishte propozuar që votimi të futej si pikë shtesë e rendit të ditës, propozimi ishte tërhequr.
Pas votimit të sotëm, Afërdita Bytyqi merr zyrtarisht detyrën e zëvendëskryesueses së KGJK-së për tre vjetët e ardhshëm.
Sinjali – aty ku e vërteta flet para lajmit!
