Një zjarr i fuqishëm ka përfshirë mbrëmjen e së premtes lagjen nr. 1 në Himarë, pranë zonës së bypass-it, duke shkaktuar dëme të mëdha materiale.
Flakët, të favorizuara nga erërat e forta, u përhapën me shpejtësi dhe rrezikuan banesa e biznese. Si pasojë, 7 banesa janë djegur plotësisht, raporton Euronews.al, transmeton Sinjali.
Për shkak të rrezikut, banorët dhe turistët u evakuuan nga zonat e prekura. Sipas të dhënave paraprake të Prefekturës dhe strukturave të Mbrojtjes Civile, nuk raportohet për persona të lënduar.
Forcat zjarrfikëse dhe ekipet e emergjencave kanë punuar gjatë gjithë natës për izolimin e flakëve. Në mëngjes, situata është vënë nën kontroll, ndërsa ndërhyrja për shuarjen përfundimtare vijon edhe nga ajri, me një helikopter.
Autoritetet po monitorojnë zonën për të parandaluar riaktivizimin e vatrave të zjarrit.
Sinjali – aty ku e vërteta flet para lajmit!
