Të paktën dy persona kanë vdekur dhe 81 të tjerë janë plagosur pas dy shpërthimeve të fuqishme në një bazë ushtarake në Bolivi, njoftuan autoritetet.
Shpërthimet ndodhën të premten në Qendrën e Mirëmbajtjes së Përgjithshme “Bolívar” në Viacha, në jugperëndim të kryeqytetit administrativ La Paz.
Ministri bolivian i Mbrojtjes, Ernesto Justiniano, tha se baza përdorej për ruajtjen e materialeve piroteknike dhe se në incident nuk ishte shpërthyer asnjë lloj arme.
Sipas tij, shpërthimi i parë dyshohet se u shkaktua nga baruti i zi që ndodhej në materialet piroteknike të ruajtura në objekt. Shpërthimi i dytë, shumë më i fuqishëm, mbetet ende nën hetim.
Autoritetet thanë se shtatë persona vazhdojnë të jenë të zhdukur, ndërsa ekipet e kërkim-shpëtimit po punojnë në zonë, raporton Euronews.com, transmeton Sinjali.
Pamje të publikuara në rrjetet sociale tregojnë një shpërthim të madh, me një re të fuqishme tymi që ngrihet në ajër.
Presidenti i Bolivisë, Rodrigo Paz, shprehu ngushëllimet për familjet e viktimave dhe urdhëroi një hetim të plotë, teknik dhe transparent për të përcaktuar shkaqet e shpërthimeve dhe nëse janë respektuar protokollet e sigurisë.
Sinjali – aty ku e vërteta flet para lajmit!
