Përzgjedhësi i Zvicrës, Murat Yakin, ka publikuar listën e futbollistëve të ftuar për ndeshjet e ardhshme të Ligës së Kombeve, ku vëmendje të veçantë marrin tre futbollistë me prejardhje shqiptare.
Në listën e “Helvetikëve” janë përfshirë Granit Xhaka, Ardon Jashari dhe Adrian Bajrami, duke bërë që prania shqiptare të jetë sërish e dukshme në përfaqësuesen zvicerane.
Granit Xhaka vazhdon të jetë një prej figurave kryesore të ekipit kombëtar, ndërsa Ardon Jashari tashmë është pjesë e rregullt e planeve të Yakin. Për Adrian Bajramin, ky grumbullim përbën një tjetër mundësi për të fituar përvojë në nivelin ndërkombëtar dhe për të konsoliduar pozicionin e tij në përfaqësuese.
Bajrami, i lindur në Zvicër dhe me prejardhje shqiptare nga Maqedonia e Veriut, kishte përfaqësuar më herët Shqipërinë. Megjithatë, në vitin 2025 ai zgjodhi Zvicrën, ndërsa FIFA miratoi ndryshimin e përfaqësimit të tij ndërkombëtar. Më pas, ai u ftua nga Yakin për ndeshjet kualifikuese të Kampionatit Botëror.
Në ciklin e ri të Ligës së Kombeve, Zvicra do të ketë një seri të ngjeshur ndeshjesh. Skuadra e Yakin do të përballet dy herë me Maqedoninë e Veriut, ndërsa në program janë edhe përballjet me Skocinë dhe Slloveninë.
Përballjet vijnë në një periudhë ndryshimesh për Zvicrën pas Kampionatit Botëror, me Yakin që po punon për të konsoliduar ekipin dhe për të ndërtuar një grup të gatshëm për sfidat e ardhshme.
Në këto plane, Xhaka mbetet një prej liderëve të skuadrës, Jashari synon të vazhdojë ta rrisë rolin e tij, ndërsa Bajrami kërkon të shfrytëzojë çdo mundësi për të bindur përzgjedhësin zviceran.
Sinjali – aty ku e vërteta flet para lajmit!
