Mbi 90 milionë njerëz në Evropë po përballen me temperatura ekstreme, ndërsa vala e të nxehtit që ka përfshirë kontinentin ka thyer rekorde historike në disa vende dhe ka ngritur shqetësime serioze për shëndetin publik.
Në Mbretërinë e Bashkuar, temperatura ka arritur në 36.1°C në Gosport, Hampshire, duke vendosur një rekord të ri për muajin qershor. Rekordi i mëparshëm prej 35.6°C ishte regjistruar në Londër në vitin 1957 dhe ishte barazuar në Southampton në vitin 1976.
Ndërkohë, Franca ka regjistruar për të dytën ditë radhazi temperaturën më të lartë në historinë e matjeve meteorologjike. Sipas shërbimit kombëtar të motit, indeksi mesatar i nxehtësisë ka arritur në 30°C, duke tejkaluar rekordet e viteve 2003 dhe 2019, shkruan “The Guardian”.
Autoritetet franceze kanë vendosur 72 departamente nën alarm të kuq, duke prekur më shumë se tre të katërtat e popullsisë së vendit. Për shkak të temperaturave ekstreme, janë shtyrë provimet shkollore, janë kufizuar oraret e vizitave në Kullën Eiffel dhe në Muzeun e Luvrit, ndërsa në Paris janë hapur parqe gjatë gjithë natës dhe janë zgjatur oraret e pishinave publike.
Sipas vlerësimeve, rreth 94 milionë njerëz, kryesisht në Francë dhe Spanjë, po përjetojnë temperatura mbi 35°C, ndërsa më shumë se 350 milionë evropianë janë ekspozuar ndaj temperaturave mbi 30°C.
Edhe Spanja ka regjistruar qershorin më të nxehtë në histori, me temperatura mesatare ditore rekord, ndërsa në Itali 16 qytete, përfshirë Romën, janë vendosur nën alarm të kuq. Në disa rajone janë ndaluar punët në natyrë gjatë orëve më të nxehta të ditës.
Organizata Botërore e Shëndetësisë ka paralajmëruar se temperaturat ekstreme po “vënë jetët në rrezik”. Drejtori i përgjithshëm i OBSH-së, Tedros Adhanom Ghebreyesus, u ka bërë thirrje qeverive të investojnë më shumë në sistemet shëndetësore dhe të veprojnë me urgjencë ndaj krizës klimatike.
Ekspertët theksojnë se ndryshimet klimatike po i bëjnë valët e të nxehtit më të shpeshta, më të gjata dhe më intensive. Sipas analizave të fundit, ngrohja globale ka shtuar temperaturat aktuale në Evropë me 2 deri në 4 gradë Celsius.
Autoritetet në shumë vende evropiane u kanë bërë thirrje qytetarëve, veçanërisht të moshuarve dhe personave me probleme shëndetësore, të shmangin ekspozimin në diell gjatë orëve të vapës, të konsumojnë sa më shumë ujë dhe të qëndrojnë në ambiente të freskëta.
Sinjali – aty ku e vërteta flet para lajmit!
