Forcat ukrainase kanë goditur 29 objekte të infrastrukturës energjetike në territoret e pushtuara nga Rusia gjatë natës së 13 gushtit, në kuadër të operacionit të quajtur “Fikja e Krimesë”.
Sipas komandantit të Forcave të Sistemeve pa Pilot të Ukrainës, Robert “Madyar” Brovdi, në mesin e objektivave ishte Termocentrali i Balaklavës në Sevastopol, si dhe disa nënstacione elektrike dhe një stacion i shpërndarjes së gazit.
“+29 nyje energjetike në jug të territoreve të pushtuara përkohësisht u vizituan nga Zogu i Forcave të Sistemeve pa Pilot, në kuadër të operacionit ‘Crimean Switch Off’”, deklaroi Brovdi.
Sulmet e fundit u përqendruan në Krime dhe në pjesët e aneksuara të rajoneve të Zaporizhias, Donetskut dhe Luhanskut.
Në mesin e objektivave ishin nënstacionet elektrike në Berdiansk, Mariupol, Prymorsk, Chernihivka, Mykolaivka dhe zona të tjera.
Forcat ukrainase goditën gjithashtu stacionin e shpërndarjes së gazit GRS-1 Mariupol, në pjesën e okupuar të rajonit të Donetskut.
Sipas Brovdit, nga 1 korriku deri më 13 gusht, forcat ukrainase kanë goditur me sukses 240 objekte të infrastrukturës energjetike në kuadër të këtij operacioni.
Por objektivi i operacionit nuk kufizohet vetëm te furnizimi me energji. Komandanti ukrainas tha se goditjet synojnë të cenojnë edhe funksionimin e infrastrukturës ruse të mbrojtjes ajrore, duke ndërprerë energjinë për radarët e palëvizshëm dhe elementë të tjerë të sistemit.
Sinjali – aty ku e vërteta flet para lajmit!
